2017 (വജ്രജൂബിലി) ല് മിശ്ര വിവാഹം, അവയവദാനം, നേതൃത്വ പാഠവം, എന്നീ വിഷയങ്ങളെ ആസ്പദമാക്കി അതിരൂപത ചാന്സലര് വെരി. റവ. ഫാ. മാത്യു കുറ്റിക്കോട്ടയില്, കിഡ്നി ഫെഡറേഷന് ഓഫ് ഇന്ത്യ ചെയര്മാന് റവ. ഫാ. ഡേവിസ് ചിറമ്മല്, അഡ്വ. വില്ലി ജിജോ തുടങ്ങിയവര് നേതൃത്വം കൊടുത്തു. അമ്മമാരുടെ വിവിധങ്ങളായ പരിപോഷിപ്പിക്കുന്നതിനുവേണ്ടി മാതാവിനെ കുറിച്ചുള്ള സംഘഗാനം, പുത്തന് പാന പാരായണം, സ്കിറ്റ്, ഗ്രൂപ്പ് ഡാന്സ്, മാര്ഗ്ഗം കളി, തോമാശ്ലീഹായെ കുറിച്ചുള്ള പ്രസംഗം എന്നീ മത്സരങ്ങള് നടത്തി. അമ്മമാരുടെ കൂട്ടായ്മയും സഹകരണവും വര്ദ്ധിപ്പിക്കുന്നതിനും അവരെ നേതൃത്വത്തിലേക്ക് കൊണ്ടുവരുന്നതിനുവേണ്ടിയും മദേഴ്സ് ക്യാമ്പ് നടത്തി. വജ്ര ജൂബിലി വര്ഷത്തില് അറുപത് പേര്ക്ക് ഡയാലിസിസ് ചെയ്യുവാനുള്ള തുക ജൂബിലി മിഷന് ഹോസ്പിറ്റലിലേക്ക് കൈമാറി. ഇരുന്നൂറില് പരം വനിതകള് കേശദാനം നടത്തി. അമല ആശുപത്രിയിലേക്ക് ക്യാന്സര് രോഗികള്ക്ക് വിഗ്ഗ് നിര്മ്മാണത്തിനായി കൈമാറി. രക്തദാനം സ്നേഹദാനം എന്ന മുദ്രാവാക്യവുമായി നൂറ്റമ്പതില്പരം അമ്മമാര് രക്തം നല്കി. അറുപത് വയസിനുമുകളില് പ്രായമായ അമ്മമാരെ ലൂര്ദ്ദ് പള്ളിയില് വെച്ച് ആദരിച്ചു. ആയിരത്തില് പരം അമ്മമാര് അതില് പങ്കെടുത്തു. മാതൃവേദിയിലെ അമ്മമാരുടെ മക്കള്ക്ക് വിദ്യാഭ്യാസ സഹായം നല്കി വരുന്നത് പ്രശംസനീയമാണ്. അതിരൂപതാ പ്രോലൈഫ് പദ്ധതിയോടു ചേര്ന്ന് വലിയ കുടുംബങ്ങളെ ദത്തെടുക്കല് പദ്ധതിയില് പങ്കാളികളായി. ഈ കാലയളവിലെ എടുത്തുപറയാവുന്ന ഒന്നാണ് രൂപതക്കുള്ളിലും രൂപതകള് തമ്മിലും മരിയന്ക്വിസ് മത്സരം നടത്തിയത്. റവ. ഫാ. ലോറന്സ് തൈക്കാട്ടില് നീണ്ട ഒന്നര വര്ഷക്കാലത്തോളം തുടര്ച്ചയായി അമ്മമാര്ക്കായി മാതാവിനെ കുറിച്ചുള്ള ക്ലാസ് എടുക്കുകയുണ്ടായി. അതിന്റെ തുടര്ച്ചയായിട്ടായിരുന്നു മരിയന് ക്വിസ് മത്സരം നടത്തപ്പെട്ടത്. സീറോ മലബാര് മാതൃവേദിയുടെ ചരിത്രത്തില് ആദ്യമായിട്ടാണ് രൂപതകള് തമ്മില് മരിയന് ക്വിസ് മത്സരം തൃശ്ശൂര് അതിരൂപതയുടെ നേതൃത്വത്തില് 2017 നവംബര് 7-ന് നടത്തപ്പെട്ടത്. ഒന്നാം സ്ഥാനം തൃശൂര് അതിരൂപത കരസ്ഥമാക്കി. പറപ്പൂര് ഫൊറോനയാണ് അതിരൂപതയെ പ്രതിനിധീകരിച്ചത്. മൂന്ന് വര്ഷം കൂടുമ്പോഴുള്ള അമ്മമാരുടെ മഹാസംഗമം നവംബര് 20 ന് ശക്തന് നഗറിലെ ദൈവശബ്ദം കണ്വെന്ഷന് നഗറില് വെച്ച് നടത്തുകയുണ്ടായി. നാലായിരത്തോളം അമ്മമാര് അതില് പങ്കെടുത്തു. വജ്രജൂബിലിയുടെ സമാപന ആഘോഷങ്ങള്ക്ക് മാറ്റുകൂട്ടുവാനും, മാര്ത്തോമാ നസ്രാണികളുടെ പാരമ്പര്യ കലയായ മാര്ഗ്ഗംകളിയെ പുനര്ജ്ജീവിപ്പിക്കുന്നതിനായും മാതൃവേദി അമ്മമാരിലൂടെ മെഗാ മാര്ഗ്ഗംകളി നടത്താന് സാധിച്ചു എന്നത് ഏറെ സന്തോഷം പകരുന്നതാണ്. 2017 ഡിസംബര് 22 ന് തൃശ്ശൂര് ലൂര്ദ്ദ് കത്തീഡ്രല് അങ്കണത്തില് നടത്തിയ മെഗാ മാര്ഗ്ഗം കളി രണ്ട് റെക്കോര്ഡ് കരസ്ഥമാക്കി, ബെസ്റ്റ് ഓഫ് ഇന്ഡ്യ റെക്കോര്ഡും, യൂണിവേഴ്സല് റെക്കോര്ഡ് ഫോറവും. 1200-ല് പരം അമ്മമാരാണ് ഇതില് പങ്കെടുത്തത്. അമ്മമാരെ പാചകകലയില് പ്രാവീണ്യമുള്ളവരായി വളര്ത്തിയെടുക്കുവാന് സഹായിക്കുന്നതിനായി രൂപതാതലത്തില് ഹോം സയന്സ് ക്ലാസ് സംഘടിപ്പിക്കുകയുണ്ടായി. നമ്മുടെ രൂപതയിലെ 217 പള്ളികളിലായി പതിനായിരത്തോളം അമ്മമാര് ഇന്ന് മാതൃവേദിയിലുണ്ട്.
